Bloc blong Opposisen ibin stap putum haos blong hem long oda mo yestede nao oli ofisieli anounsem nem blong hu I tekem wanem posisen.
Yestede oli confem se Union of MP blong Port Vila mo foma Atoney Generel, Ishmael Kalsakau hemi stap olsem niu Lida blong Oposisen.
Mr Kalsakau hemi blong Ifira island we istap foret long Port Vila Haba. Hemi wan memba blong Union blong ol Moderet Pati (UMP) mo hemi fes taem blong hem blong pipol I electem hem igo insaet long palamen.
Confemesen ya ikam aot long taem blong wan pres conferens blong Oposisen long palamen haos yestedei aftanun.
Taem ya Oposisen Bloc I talem aot tu nem blong foma praem minister mo lida blong Pipols Progressive Pati, Sato Kilman, olsem depiuti lida blong oposisen
Foma agrikalja minister, Christopher Emelee, hemi kasem apointmen olsem Whip blong oposisen. Hemi memba blong Vanuatu Nasinol Divelopmen Pati lo constituensi blong Torres.
Oposisen I makem tu foma minister blong intenel afeas, Hosea Nevu blong Iauko Grup, istap olsem jeaman blong Palamentari Accounts Komiti. Long law, komiti ya jeaman blong hem I mas kam long saet blong oposisen wetem tingting blong mekem wok blong komiti ya I strong.
Yestede tu oli nemen ol senia technical man blong ol pati long oposisen we bae oli holem wok lo ofisiel palamenteri oposisen ofis long palamen haos. Olgeta ya I kat foma fes PA blong intenel afeas, Levi Tarosa (Iauko Grup) I wok olsem praevet secretary blong lida blong oposisen; ikat foma fes PA blong blong Sato Kilman, John Shing (PPP) we hemi holem wok olsem political advaesa coodinesen; Richard Kaltongga (PPP) I holem wok olsem political advaesa liaison; Georgio Carlo (UMP) hemi hok olsem political advaesa general; mo Xavier Kasso Andre istap olsem ofis supevaesa.
Long semtaem wan sinia memba blong oposisien we ino wantem nem blong hem I kamaot I talem se ol a activity blong UMP long ol dei I tes pas, I kosem sam confusen.
Hemi talem se long taem blong ol negosiesen blong fomem gavman ikat wan elected MP blong UMP istap oltaem klosap wetem Gavman saet.
Vaes president blong UMP tu ibin talem aot afta long consecresen seves blong ol niuli elkected MP se UMP bae I muv igo joinem gavman saet long taem palamen I sitaon bakagen blong tokbaot badjet long nekis manis.
Hemi se long taem blong apoinmen blong ol niu minister blong gavman, ibin kat 2 memba blong UMP, I stap wetem grup blong Gavman.
Be, hemi talem se confusen I kamaot taem UMP bakegen I tekem posisen blong Oposisen lida mo naoia oli no save sapos ol toktok we Vaes president blong parti I talem I tru or no.
Hemi talem se naoia bae oli stap nomo blong watsem wanem bae I happen long nekis palamen siting.