Ol jif blong Pentecost tu oli taet blong harem mo lukim ol politician istap muv-muv from wan pati igo long joinem nara pati, mo tu blong oli muv aot long gavman igo long oposisen or long oposisen igo long Gavman.
Mesej ya, hemi wan long ol bigfala poen long toktok blong wan jif representetiv blong Sentrol Penticost I putum long Praem minister Charlot Salwai Tabimasmas long taem blong visit igo long eria blong olgeta long wiken.
Wan jif representetiv, Chief Mariak Vital Bulesanibo i talem se ol chief mo pipol blong Pentecost, oli taet long fasin blong stap jenisim gavman long evri yia mo oli wandem niu koalisen gavman blong Praem Minista, Sariboh Charlot Salwai Tabimasmas blong hemi stap long 4 yia.
Bigfala mesej ya ibin stap tu insaet long wan petisen we ol jif oli bin handem ova long Praem Minista Sariboh mo delegesen blong hem long taem blong fes official visit blong hem long Melsisi long sentrol Pentecost long las satede.
Mariak Bulesanibo i askem Praem Minista Sariboh Tabimasmas blong gavman blong hem I fainem wan gud fala way blong electoral system blong ol sitisen blong Ripablik blong Vanuatu blong evri pipol I save exesaesem raet blong olgeta long taem blong wan eleksen.
Hemi talem se oli glad blong givim petisen ia long niu gavman from we oli biliv se hemi nid blong pipol mo gavman institusen long aelan blong Pentecost, blong oli save gat wan wota saplae system long ol eria we oli no kat yet. Rod blong trak stat long Lekasubu igo kasem long Lalwori mo rod blong trak stat long Lebutsubutsuwet kasem Sadine Bay.
Chief Mariak Bulesanibo I askem tu blong ikat elektrisiti pawa long Melsisi komuniti mo Ena komuniti. Oli askem blong Melsisi mini hospital, hemi kat wan dokta long hem mo blong Tsingbwege dispenseri blong hemi mas gat wan nurse. Long saed blong sport, ol chief oli askem blong Melsisi, hemi gat wan sport stadium.
Chief Mariak Bulesanibo I talem tankiu long vot blong pipol blong Vanuatu tru long 46 memba blong palaman blong olgeta blong mekem se wan pikinini blong sentrol Pentecost, hemi save kam praem minister tede.
Hemi talem se ol chief blong Pentecost, oli askem evri pipol blong aelan ia mo Vanuatu blong oli prea tugeta blong helpem niu gavman ia blong hemi mekem change blong achivim ol vision we gavman igat olsem National Antem blong Vanuatu, hemi talem.
Chief Mariak Bulesanibo I talem se I gud blong evri sitisen blong Vanuatu oli mas pratisim ol tok tok blong sing sing blong kantri blong yumi we hemi tokbaut wok from laef blong yumi ol man ples.
Long saed blong praem minister Sariboh Tabimasmas, hemi talem tankiu long long petisen we ol chief, oli mekem igo long gavman.
Hemi talem se long olgeta pipol we oli bin stap long Melsisi long taem ia se gavman we hemi lidim naoia, hemi stap blong finisim 4 yia term blong hem mo praeriti blong hem, hemi blong mekem change long kantri.
Praem Minista Sariboh Tabimasmas, hemi I talem se risal blong las snap eleksen, hemi wan klia meseij blong pipol blong Vanuatu se oli wandem change taem we moa long 2/3 blong ol memba blong palaman, oli niu MP.
Praem Minista i talem se blong mekem change ia, gavman, hemi nidim uniti bitwin ol politikol lida blong oli save karemaut ting ting blong change we pipol i ekspresem long taem blong vot.
Hemi talem se gavman we hemi lidim tede hemi unaetem ol politikol pati blong oli save wok wan blong mekem change mo wetem wan majority blong 39 MP we oli stap long gavman blong hem, bae oli save mekem change ia.
Praem Minista Sariboh Tabimasmas, hemi talem se ol politikol lida oli disaed finis blong ikat uniti blong oli save mekem change be hemi jalenjem ol chief se olgeta tu, oli kat uniti bitwin olgeta blong change we oli wandem i save happen o nogat.
New Praem Minista ia i talem se naoia ikat uniti long National level finis be i gud tu blong uniti, hemi mas stap bitwin ol chief, pipol, komuniti mo vilej.