PM Sariboh i mitim VBTC tede moning

Praem Minister mo semtaem minister we hemi responsibol long Vanuatu Broadcasting and Television Corporation, SARIBOH Charlot Salwai Tabimasmas I talem se hemi wandem blong pipol blong Vanuatu, oli kasem Radio Vanuatu long evri aelan blong olgeta.

Praem Minista SARIBOH Charlot Salwai Tabimasmas I mekem tok tok ia long tede taem we General Manager blong VBTC, Fred Vurobaravu, Board blong VBTC mo ol senia staff blong VBTC, oli bin kam brivim hem long situesen we istap naoia long kampani.

Praem Minista I talem se ol pipol we oli stap long aelan, oli kat raet blong save wanem kaen development gavman blong olgeta istap mekem.

Hemi talem se ol gavman ministry mo dipatmen, oli kat plande gudfala infomesen about development blong kantri blong olgeta be ol infomesen ia, ino save kasem olgeta taem we Radio Vanuatu ino kasem olgeta long ol aelan blong olgeta.

Praem minister I talem se plande taem, gavman istap go raon long ol aelan blong mekem ol awerness about ol projek. Praem minister I talem se taem ol man blong gavman, oli stap go raon long aelan, hemi kostem gavman mani. Praem minister I talem se sapos Radio Vanuatu I kasem ol aelan, bae hemi nomo nid blong ol man blong gavman, oli stap go raon long ol aelan. Praem minister I talem se awerness tru long Radio Vanuatu, hemi save kasem more pipol komperem long hemia we wan tim blong gavman istap go raon long ol aelan.

Praem minister I talem se gavman, hemi givim mani igo long VBTC long evri yia be seves blong VBTC ino kasem ol pipol long ol aelan.

Praem Minister I wandem lukim Board mo Management blong VBTC I mekem wok hariap blong pipol I save kasem Radio Vanuatu mo iven Television blong Vanuatu long aelan. Praem Minister I talem se naoia we gavman blong hem, hemi launchem 100 Days Plan blong hem, hemi important blong pipol long ol aelan, oli kasem Radio Vanuatu blong save abaut development we gavman istap karemaut.

Praem Minista I talem se from wanem nao, FM107 we hemi wan smol radio stesen nomo, hemi kasem more pipol komperem long Radio Vanuatu we hemi radio blong gavman. 

Mr Vurobaravu wetem tim blong hem, oli infomem Praem Minista se VBTC ikat problem wetem ol transmita blong hem. Tim blong VBTC infomem praem minister se ikat plan blong mekem Radio Vanuatu I pas tru igo long ol aelan tru FM frekuensi. Oli talem se projek ia, bae hemi impruvum kaverej long ol aelan mo bae hemi daonem cost blong ol transmita we oli stap iusim naoia long saed blong shortwage frekuensi.

Mr Vurobaravu wetem tim blong hem, oli bin infomesen praem minister tu about financial difficulty we VBTC istap tru long hem mo proposem sam plan blong impruvum financial situesen blong kampi.

     

Author: 
Harold Obed