Nomata olketa polisi blong niufala President blong United States long Pacific ino klia iet, wanfala samting wea hem klia finis nao hem long saet long Climate Change.
Donald Trump hem no biliv long Climate Change wea olketa gavman and pipol long Pacific Islands i wari tumas long hem.
Mr Trump hem talem aot finis hem bae aotim Amerika long disfala Paris Agriment long saet long Climate Change wea former President Barack Obama hem lid long kamapum an evri kantri long wol i agri finis long hem.
Dr Tarcisius Kabutaulaka hu hemi lecturer long University blong Hawaii hem se diswan bae hem spoelem nao waka blong olketa aelan kantri long Pacific wea olketa gohet fo safa finis long Climate Change.
Dr Kabutaulaka hem se hem bae afektem tu strategic interest blong Amerika long Pacific.
Hem se nara samting wea iumi no save iet long wanem nao hem tingting blong Trump Administresen long olketa agrimen wea Amerika i garem wetem olketa kantri long Pacific.