Vanuatu lida itok Mathew na Hunter Island ino blong France

France imas gat sampla kaen tingting long kisim moni long ol solwara klostu long ol Island blong Mathew na Hunter, olsem na emi no laik givim igo bek long Vanuatu.

Nambawan President blong Vanuatu, Ati George Sokomanu i mekim despla toktok pastem ol gavman lida blong France na Vanuatu bai holim wanpla miting long Paris klostu, long toktok long husat tru i papa long ol despla Island.

France isave tok olsem emi papa long despla tupla Island, tasol Vanuatu isave tok ol Island ia em blong en.

Mathew na Hunter Islands istap klostu long Tafea provins long south blong Vanuatu na tu emi stap klostu long New Caledonia.

Ol pipal blong Vanuatu isave tok olsem ol despla Island i impotant tumas long kalsa blong ol.