Niu ambassada blong China long Vanuatu, Liu Quan i talem se China bae hemi helpem Vanuatu blong hemi save difendem kala blong hem long taem blong saut Pacific mini gem long 2017.
Mr Liu i talem se China i redi blong ofarem moa trening long ol best atlet blong Vanuatu blong oli save winim ol medal long taem blong gem ia.
Niu ambassada blong China, hemi mekem tok tok ia taem we hemi bin mit wetem praem minista, Charlot Salwai long yestede (Tosde).
Mr Liu i talem se hemi bin talem se tok tok ia taem we hemi bin visitim minista blong sports, Nato Taiwia.
Hemi talem long Praem Minista Salwai se oli save sendem ol best atlet blong Vanuatu blong oli go karem moa trening long wan manis long China bifo gem.
Niufala stedium blong Port Vila we istap long Korman, gavman blong China nao, hemi buildim mo Vanuatu nao, bae hemi hostem Saut Pacific mini gem ia.
Gavman blong Jaena hemi no assurem Vanuatu nomo long kaen trening olsem.
Long Samoa, Jaena I bin sendem 20 coach long 2006 igo trenem ol athlete blong olgeta from SP Games.
Kasem naoia, ol wok blong bildim ol ples blong plei blong athlete long Korman ino stat yet. Olfala stedium we istap long Korman ya mo stap nogud istap ya, wan praevet kampani I pulum daon finis bifo long taem blong saeklon Pam las yia.
Last yia long manis June, Pasifik Games Kaonsel I asurem evriwan se emi hapi wetem ol progress we I stap lid igo blong mekem I posibol blong Vanuatu I hostem SP Games ya nekis yia.
2017 Pasifik Mini Games ya bae hemi olsem namba 10 edisen blong hem.