Vanuatu Gavman i tokaot agensem lida blong oposisien mo talem se hemi sut stop blong stap mislidim ol pipol blong Vanuatu tru long media.
Pablic Relesen Ofisa blong Gavman, Hilaire Bule i mekem toktok ya folem ol coment we Mr Ishmael Kalsakau ibin mekem abot Vanuatu Registri Seves (VRS).
Bule i talem se long saed blong isiu blong VRS, Mr Kalsakau, hemi no should mislidim ol pipol mo kuestenem se 50% blong mani blong VRS, hemi go wea?
Hemi se kwesten blong mane ya blong VRS, hemi happen long stat long taem we Mr Kalsakau, hemi bin Attorney General mo hemi bin advaesem gavman tu long VRS long taem ia.
Hermi talem se ofis blong prime minista, hemi save gud se Mr Kalsakau, hemi save gud wea ples nao 50% blong mani ia, hemi stap long hem o hemi go long wanem kampani be hemi stap mislidim pipol blong Vanuatu se hemi no save.
“Koalisen gavman we prime minista Salwai i lidim tede, i talem se VRS, hemi stat taem we Mr Kalsalau, hemi stap yet olsem AG blong Vanuatu mo hemi no nomol se hemi no save se 50% blong mani ia istap wea”.
Bule I talem se lida blong oposisen, hemi no sut pretend se hemi no save wea ples nao 50% blong mani blong VRS ia, hemi stap long hem mo hemi hem yet, hemi stap long gudfala posisen blong talemaut se mani I stap wea.
Long saed blong peimen blong ol wokman blong gavman, gavman blong prime minista Salwai, hemi asurem ol woka we oli ritae finis se hemi diuti mo responsabiliti blong gavman we hemi lidim tede mo ol gavman we bae oli kam long fiutsa blong oli mas peim ol wokman blong olgeta taem we oli ritae.
"Gavman we mi lidim, hemi stap luk luk wan gudfala program we bae hemi benefitim evri wokman we oli ritae istap mo olgeta we bae oli ritae yet. Yumi evriwan i save se mani we palaman i pasem las taem, 300 000 000 milien vatu hemi smol. Mani blong pem ol ritae wokman blong gavman, hemi 10 taem moa long hem ia we palaman hemi tes pasem", Mr Salwai i talem.
Gavman blong prime minista Salwai, hemi komitim hem blong solvem wan lontaem isiu blong peimen blong ol wokman blong gavman we oli ritae mo ol past gavman ino bin save mekem be bae hemi mekem long wan fasin we evriwan bae oli kasem mani blong olgeta be ino samfala nomo.
Bule i talem se program we gavman istap wok long hem ia nao tede, bae hemi mekem evri wokman wantaem, oli save kasem ritaemen mani blong olgeta.
Hemi mekem poen tu se Gavman blong tede, hemi lukim impotens blong gavman mo ol semi-gavman organisation, oli mekem provision o redi long mani long evri yia blong pem, ol ritaem wokman blong olgeta be oli no mas lego i hipap olsem we hemi situesen naoia.
Pic: Government PRO Hilaire Bule