Ofis blong Prime Minista i talem se hemi gud blong opposition, hemi gohet blong stap holem press konfrens blong hem be hemi gud blong hemi mekem moa risej long olgeta issue we hemi wandem tokbaut long ol press konfrens ia.
Ofis blong Prime Minista i askem ol media tu blong oli mekem ol investigation mo risej long ol tok tok we istap kamaut long ol press konfrens ia blong oli no joenem opposition blong mislidim ol pipol blong Vanuatu.
Ofis blong Prime Minista i mekem komen ia folem tok tok blong lida blong opposition long Daily Post news paper long las Saturday ova long ting ting blong gavman blong introdiusim income tax.
Ofis blong Prime Minista i talem se opposition, hemi failed blong tokbaut stret tingting blong income tax long press konfrens blong hem.
Ofis blong Prime Minista i talem se Income tax we gavman ikat ting ting blong hem introdiusim, hemi no wan tax per head o wan wan man mo wan wan woman long Vanuatu.
Ofis blong Prime Minista i talem se olsem we nem blong hem i talem "income tax" bae hemi aplae nomo long olgeta man mo woman we oli kasem income o salary long wan manis o olgeta man mo woman we li wok mo oli kasem wan salari.
Ol man mo woman we oli no wok o oli no kasem wan salari bae income tax ia, ino aplae long olgeta.
"Income tax,hemi wan fea tax komperen long Value Added Tax, VAT, we istap naoia. Man mo woman we ino wok, olgeta tu i pem VAT semak olsem ol man mo woman we oli kasem ol bigfala salari. System blong tax we istap naoia long Vanuatu, hemi mekem man mo woman we i pua, bae hemi gohet blong hemi stap pua mo man mo woman we i rich, bae hemi gohet blong kam rich. System blong tax we istap naoia long Vanuatu, hemi mekem mekem se ikat bigfala difrens bitwin pua mo rich", PM Salwai i talem.
Ofis blong Prime Minista i talem se Mr Kalsakau, hemi kritisaesem income tax be hemi fail blong kamap wetem wan way blong helpem Vanuatu blong resemap mani blong mekem se ol pipol, oli save kasem sevis deliveri blong gavman.