Praem minista Charlot Salwai i talem se hemi wandem luk rilesen we istap naoia bitwin Vanuatu mo New Caledonia ikam strong moa from we Vanuatu mo New Caledonia i fomem wan famili nomo.
“Nomata we mi wan Ni-Vanuatu mo yufala New Caledonian, kanak, caldoche mo ol narawan be long ae blong ol francophone famili, yumi ol brata mo sista insaed Pacifique Ocean”, PM Salwai i talem.
Praem minister blong Vanuatu, hemi mekem tok tok ia long taem we hemi bin hostem wan kakae long las fraede long Au Fare restaurant blong makem visit blong presiden blong gavman blong New Caledonia, Philippe Germain mo ol memba blong cabinet blong hem.
Delegesen blong Mr Germain, hemi bin kasem kantri long las fraede mo lego Vanuatu bagegen long las sande.
Mr Salwai i talem se natural mo geographical proximity bitwin Vanuatu mo New Caledonia mo ol exchange bitwin ol pipol blong Vanuatu mo New Caledonia, oli ol natural fakta we oli stap blong rimaenem yumi ol lida blong tufala kantri ia se yumi gat wan common duti we hemi blong gohet blong maintenem mo mekem ikam strong moa rilesen bitwin tufala kantri long benefit blong ol pipol blong Vanuatu mo New Caledonia.
Praem minister Salwai i talem long Presiden Germain se hemi wandem luk turisim i open moa bitwin tufala kantri mo develop blong benefitim ol pipol blong Vanuatu mo New Caledonia.
Mr Salwai i talemaut long Presiden Germain long taem blong kakae ia se hemi presem aksen we gavman blong New Caledonia, hemi tekem blong mekem se pipol blong Vanuatu, oli nomo nidim visa blong go long New Caledonia.
Decisen ia, hemi aplae nomo long ol pipol blong Vanuatu we oli wandem go long New Caledonia be bae oli no save stap bitim 3 manis.
Praem minister blong Vanuatu i talem se hemia, hemi wan gudfala pruv blong rilesen we istap bitwin tufala kantri.
Mr Salwai i talem long Mr Germain se hemi tru ikat sam common isiu istap we tufala i bin tok tok ova long hem long taem blong miting blong tufala long las fraede aftenun long ofis blong hem be oli no sapos blong afektem ol gudfala rilesen we istap bitwin Vanuatu mo New Caledonia.
Praem minister Salwai, hemi proposem long Presiden Germain blong tufala i sidaon mo tokbaut ol isiu we istap mo fainem ol solusen blong olgeta.
Hemi letem Mr Germain mo delegesen blong hem blong save se Vanuatu bae hemi gohet mo bae hemi mekem best blong hem blong sapotem New Caledonia long ting ting blong hem blong go insaed long region mo kam patna insaed long ol difren regional organization.
Long taem blong visit blong gavman blong New Caledonia long las wik, Mr Germain wetem delegesen blong hem, oli bin visitim ol ples olsem ol minister blong gavman, Melanesian Spearhead Group, Abbattoir, ol skul, sport fasiliti mo ol nara eria we gavman blong New Caledonia, hemi kat ting ting blong help.