Vanuatu Gavman, tru long Kaonsel blong ol Minista (KbM), i bin kat ejen miting blong hem mo agri blong Vanuatu Gavman I givim VT10 million festaem igo blong ol givhasn long ol pipol blong Fiji we cyclone Winston I tes spolen sitaon blong olgeta.
Miting ya I tekem ples long Wednisdei aftenun blong namba 24 Februari 2016 long wik ya.
Long miting ia, KbM i notem ol infomesen we Kaonsel pepa i putum i kam blong endosem, blong Gavman blong Vanuatu hemi diploem wan smol tim we Minista blong ol Foren Afea, Bruno Leingkone bambae hemi lidim wetem wan ofisol blong hem.
KbM miting ya I agri tu blong instraktem Ministri blong Faenans blong priperem wan inisel-rilif asistens pakej blong VT10 milian VT ya blong Minista blong ol Foren Afea hemi tekem i go mo givim long Minista blong ol Foren Afea long Fiji blong givhan wetem nasonal rilif efot blong Fiji.
Miting blong ol minister ya I agri se amont blong VT10, milian ya bae I kamaot long Nasonal bajet.
KbM I agri tu blong Instraktem Minista blong ol Foren afea blong raet i go long Sekretariat blong MSG mo Jeaman blong MSG (Praem Minista blong Solomon blong singaotem wan Spesol miting blong ol Foren Minista mo Lida blong MSG blong konsiderem wan rikaveri pakej blong Fiji.